Әскерге бармағандар арнайы дайындықтан өтіп, әскери билет ала алады - ҚР Қорғаныс министрлігі
АСТАНА. 12 сәуір. ҚазАқпарат - Әскер қатарында болмаған азаматтар арнайы дайындықтан өтіп, әскери билет ала алады. Бұл туралы бүгін Астанада өткен баспасөз мәслихатында ҚР Қорғаныс министрлігінің баспасөз хатшысы Қайсар Мұғалов мәлім етті.
«Ол үшін арнайы әскери-техникалық училищелер құрылып жатыр. Сол жерде сан алуан себептерге байланысты әскер қатарында болмаған азаматтар арнайы дайындықтан өтіп, әскери резервке қабылданады», - дейді Қ.Мұғалов. Оның сөзіне қарағанда, күзге қарай оқуға қабылдау науқаны басталады. «Осыдан кейін 22-27 жас аралығындағы ер азаматтар мемлекеттік тапсырыс және жеке қаржысына оқып, әскери билет ала алады. Бұл жұмыстың негізгі мақсаты - мобильді резервті ұлғайту», - дейді министрліктің баспасөз хатшысы.
