Әскери сот өртке қарсы қызмет комитетінің төрағасы мен екі департамент басшысына үкім шығарды

Ақмола гарнизоны Әскери сотының үкімімен ҚР Төтенше жағдайлар министрлігі Өртке қарсы қызмет комитетінің төрағасы Н. Дербисов пен Шымкент қаласы Төтенше жағдайлар департаментінің бастығы М. Жақсыбаев 5 жылға, Жетісу облысы Төтенше жағдайлар департаментінің бастығы Б. Ізбасаров 9 жылға бас бостандығынан айырылды.

Антикордың дерегінше, олар бизнес өкілінен кәсіпкерлік қызметіне қамқорлық жасағаны үшін жалпы сомасы 39,7 млн теңге сомасында пара алған.

«Сондай-ақ, Б. Ізбасаров 1,7 млн теңге сомасында өзіне қосымша ақшаны заңсыз есептеп, билікті асыра пайдаланғаны үшін сотталды.

Аталған адамдар мемлекеттік қызметте және квазимемлекеттік сектор субъектілерінде лауазымдарды атқару құқығынан айырылды», — деп жазды ведомстводан.

Сот үкімі заңды күшіне енген жоқ.

Айта кетейік, бұған дейін жеке сот орындаушысы 1,2 млн теңге алиментті қалтасына басқанын жазғанбыз.