Ассамблея «Қазақстанның 100 жаңа есіміне» енген тұлғаларды насихаттамақ - Дархан Мыңбай
«Қазақстанның 100 жаңа есімі» жобасы жер-жерде талқыланып жатыр. Бұның өзі қоғамдық өмірге бір серпін әкелді десек те болады. Айтылған 302 кандидатқа дауыс беретін боламыз. Бұл өте жауапты да маңызды жұмыс. Өйткені, бұл жоба бойынша біз шын мәнінде лайықтыларды таңдап алуымыз керек. Ассамблеяның барлық құрылымдары, этномәдени бірлестіктер жұмысқа белсене атсалысты. Ассамблеяның тарапынан 893 адамның жетістігі мен өмірі туралы мәлімет порталға (el.kz порталына - авт.) енгізілді», - дейді ҚХА Төрағасының орынбасары.
Дархан Мыңбай өз сөзінде Елбасы айтқандай, ұлттың алтын қорын қалыптастырып жатқан адамдарды таңдап алудың маңыздылығын ерекше атап өтті.
«Ассамблея мүшелері осы тарапта жұмыс атқарып жатқан комиссия құрамында болды. Бүгінгі таңда қоғамдық дауыс беру арқылы жобаның аяқталу кезеңіне таяп қалдық. Барлық азаматтарды дауыс беруге шақырамын. 100 жаңа есім Қазақстанда бірінші рет өткізіліп отыр. Оның құрамына енудің өзі, меніңше, зор сый-сияпат. Ол тізімге енген адамға деген құрмет бұнымен тоқтап қалмасы анық», - дейді ол.
Сонымен бірге, Дархан Мыңбай 2018-2019 жылы ҚХА 11 жоба, атап айтқанда, «Жастардың алтын бесігі», «Менің және менің елімнің жетістіктерінің тарихы», «Өзіңді өзің шыңда», «Көшбасшы бол», тағы сол секілді жобаларды қолға алып жатқанын жеткізді. Бұның барлығы «Қазақстанның 100 жаңа есіміне» енген адамдардың еңбегін насихаттап, дәріптеуге септігін тигізбек.
«Адамдардың өзінен емес, олардың еңбегінен үлгі алу керек деген ойдамын. Әрбір азамат Қазақстанның 100 жаңа есіміне енген адамдардан өзіндік үлгі алар деген ойдамын. Сөзсіз, бұл жоба өзінің жалғасын табуы керек. Өйткені, біз өзіміздің заманымыздың үлгілі әрі озық адамдарын халыққа көрсете білуіміз керек», - деп түйді Дархан Мыңбай.
Еске сала кетсек, 100esim.el.kz сайтында «Қазақстанның 100 жаңа есімін» анықтау бойынша 18 қазанда онлайн дауыс беру басталады. Дауыс беру 10 қарашада аяқталмақ.