Астана әуежайына жақын маңда қамыс өртеніп жатыр
АСТАНА. ҚазАқпарат - Өрт сөндірушілер Астана шетіндегі Майбалық көлінің бойындағы өртті сөндіріп жатыр, деп хабарлайды ҚазАқпарат тілшісі ҚР ІІМ Төтенше жағдайлар комитетінің баспасөз қызметіне сілтеме жасап.
«Бүгін сағат 13:37 шамасында Астана қаласы Есіл ауданындағы «Нұрсұлтан Назарбаев» Халықаралық әуежайының артында, Майбалық көлінің бойында қамыс өртенді. Өрттің аумағы 3 мың шаршы метрді құрады», - делінген баспасөз хабарламасында.
Тілсіз жау шамамен сағат 16:10-да ауыздықталған. Алайда өрт сөндіру жұмыстары әлі де жалғасуда.
«Оқиға орнында төтенше жағдайлар қызметінен 15 адам мен 4 арнайы техника жұмыс жасап жатыр. Сонымен қатар, өрт сөндіруде 1 арнайы техника, қайық, 4 адам, «Зеленстрой» ЖШС-нің бір техникасы, «Астана Орманы» ұйымының 6 техникасы (3 ПМ, 2 трактор, 1 УАЗ) тартылды», - деп хабарлады ТЖК-дан.
