Астана әуежайында терроризмге қарсы оқу-жаттығу өтіп жатыр

АСТАНА. ҚазАқпарат - Астана қаласының халықаралық әуежайында Терроризмге қарсы астаналық жедел штабы «Дабыл-2015» оқу-жаттығу іс-шарасын өткізіп жатыр. Шараның өту уақыты 11.00-ден 13.00-ге дейінгі аралықты қамтиды.

Бұл туралы Астана ІІД баспасөз қызметі хабарлады.

Оқу-жаттығудың мақсаты - көлік инфрақұрылымы объектілерінде ланкестік қаупі орын алған кезіндегі өзара әрекетті пысықтау.

Жаттығудың міндеттері жарылғыш құралдарды іздеу мен оларды істен шығару, кепілге алынған адамдарды босату және террористерді жою арқылы әуе көлігінде терроризм актілерінің жолын кесудегі механизмді жетілдіруге бағытталған.