Астана чемпиондарын қарсы алды
Еске салайық, құрлықтағы біріншілікте біздің былғары қолғап шеберлеріміз 7 алтын, 1 күміс алып, Қазақстан боксы тарихында үлкен жетістікке жеткен болатын.
Чемпиондарды қарсы алуға туған-туыстарымен бірге, жақындары мен достары келді. Сондай-ақ, боксшыларды қарсы алуға қаланың қоғамдық жұртшылығы,спорт сүйер қауым және журналистер де жиналды. Олар түскен бойда құраманың бас жаттықтырушысы Мырзағали Айтжановты құттықтады.
«Біздің жігіттер чемпионатқа жақсы дайындықпен барды. Әзірліктің сапалы жүргенін нәтиже көрсетіп отыр. - деді Мырзағали Құланұлы. - Жалпы алғанда, біздің басты жарысымыз әлі алда. Әлем чемпионатына енді жақсылап дайындалуымыз керек. Ірі құрлықтық біріншілікке құрамның алдыңғы қатарлы спортшыларын жіберіп, әлем чемпионаты алдында қауқарымызды байқап алғымыз келді. Қатыспаған бірнеше спортшыларымызды айтпағанда, біз Иорданияда құраманың ең мықты боксшыларын шығардық. Біздің жігіттер түгелге дерлік салмақ санаты бойынша чемпион атанды. Олардың қарсыластары да осал емес еді. Мәселен, Мерей Ақшалов Моңғолияның Олимпиада жүлдегерін тізе бүктірді. Негізгі қарсыластар Үндістан мен Өзбекстан командасынан болды».
Бокстан құрама капитаны Данияр Елеусінов Азия чемпионатында алтын алды. Әрі оның қанжығасына құрлық біріншілігінің үздік боксшысы деген атақ та бар.
«Нәтижелерге өте ризамын. Үздік боксшы атанғаным екі есе қуаныш сыйлады. Барлық күш-жігерімді, техникамды салып, қарсыластан басым түсуге тырыстым. Ең мықты қарсылас екінші жекпе-жектегі Азия чемпионатынынң бұған дейінгі чемпионы болды. Алда әлем чемпионатына дайындық тұр. Бірақ, біз үшін осының барлығы да дайындық болып саналады», - деді ол.
Қазақстандық команданың қоржынына алғашқы алтынды жеңіл салмақта Теміртас Жүсіпов салды. Бұл ірі халықаралық жарыстардағы оның тырнақалды жеңісі еді. Сондықтан, осы жеңістің орны айырықша көрінеді.
«Мен рингке алғаш болып шықтым. Не нәрсені тыңнан бастау оңай емес қой. Қобалжығаным да рас - дейді Теміртас, - Сәтін салғанда жеңіске жетіп, ең бастысы, жаттықтырушымның сенімін ақтадым. Шынымды айтсам, Азия чемпионатында осындай биік шыңға шығамын деп ойлаған жоқпын. Сезімімді сөзбен айтып жеткізе алар емеспін».