Астана қаласы Сарыарқа ауданының №2 соты ҚР бұрынғы денсаулық сақтау министрі Ж.Досқалиевті 2 айға дейін қамауда ұстауға рұқсат берді - ҚР Қаржы полициясы
АСТАНА. Қазанның 12-сі. ҚазАқпарат /Қаламқас Әбуова/ - Дүйсенбі, қазанның 11-і күні ҚР қаржы полициясы органдары бұрынғы денсаулық сақтау министрі Жақсылық Досқалиевке билікті асыра пайдаланғаны және аса ірі мөлшерде пара алғаны туралы айып тақты,
деп хабарлайды Қазақстан Республикасы Экономикалық қылмысқа және сыбайлас жемқорлыққа қарсы күрес департаментінің баспасөз орталығы.
Ағымдағы жылғы қазанның 12-сі күні айыпталушыға қатысты «қамауға алу» шарасы туралы өтініш беріліп, прокуратура органдары онымен толықтай келісті.
Сол күні Астана қаласы Сарыарқа ауданының №2 соты Досқалиевті қамауға алуға рұқсат берді (2 ай мерзімге дейін).
Айыпталушы Астана қаласының тергеу оқшаулау орынына ауыстырылады. Тергеу мүддесі үшін басқа ақпарат жария етілмейді, деп хабарлады ҚР Қаржы полициясы.
