Астана қаласының әкімдігінде көп балалы аналарды «Алтын алқа» және «Күміс алқа» алқаларымен марапаттау салтанаты өтті
деп хабарлайды ҚазАқпарат.
Қазақстан Республикасы Президентінің Жарлығымен бүгін «Алтын алқаны» - 60 және «Күміс алқа» алқасын - 24 ақжаулықты ана тақты. Мемлекеттік наградаларды Сарыарқа ауданының әкімі Сәбилә Мұстафина тапсырды.
С.Мұстафинаның сөзіне қарағанда, 6 және одан да көп балаларды тәрбиелегені үшін мемлекеттік медальдар аналардың келіп түскен өтініштеріне байланысты кезең-кезеңімен тапсырылып келеді. Бұған дейін бұл құрметті алқаны Сарыарқа ауданында тұратын 11 көп балалы ана таққан болатын. Алдағы күндері олардың қатары тағы 54-ке толығады деп күтілуде.
Аудан әкімінің айтуынша, Президенттің Жарлығымен «Алтын алқа» және «Күміс алқа» медальдарымен марапатталуы тиіс көпбалалы аналардың нақты санын дөп басып айту мүмкін емес. «Себебі Астанада көші-қон үрдістерінің қарқыны жоғары. Сондықтан статистика да күн сайын өзгеріп отыр», - дейді ол.
Айта кетейік, Мемлекет басшысы Н.Назарбаевтың тапсырмасымен көп балалы аналарға құрмет атақтарын беру тәртібі қайта қаралып, 2010 жылдан бастап «Алтын алқа» наградасы 7 баланы, ал «Күміс алқа» 6 баланы тәрбиелеген аналарға берілетін болып ұйғарылды. Осындай наградаларға лайықты аналар ай сайын 8 мың 478 теңге мөлшерінде арнайы мемлекеттік жәрдемақы алады.