Астана қаласының іргесінде Электрондық ақпарат сақтайтын орталық ашылды
КӨКШЕТАУ. ҚазАқпарат - Ақмола облысының Қосшы ауылында «Interget Solution» ЖШС-нің электрондық ақпаратты сақтау және өңдеу орталығы қолданысқа берілді, деп хабарлайды ҚазАқпарат тілшісі.
Нысанның ашылуы салтанатына аймақ басшысы Мəлік Мырзалин қатысып, құттықтау сөз сөйледі.
Жоба бойынша аталмыш нысанның құрылысы 4,5 миллирад теңгені құрайды. Оны серіктестік басшылығы екінші деңгейлі банктен несие ретінде алған. Қазіргі заманғы құрылғылармен жабдықталған орталықта квазимемлекеттік және жеке секторға қызмет көрсетілетін болады.
Кәсіпорын директоры Серікжан Құнанбаевтың айтуынша, орталықтың аумағы 1,2423 гектарды құрайды. Орталық клиенттердің электрондық ақпараттарын сақтап, өңдеуге мүмкіндік береді.
«Мұнда электрондық ақпаратты сақтайтын 100 орын бар. Қызмет ауқымы Қазақстан Республикасы аумағын құрайды. Алдағы уақытта Қосшы ауылында коммерциялық құрылымдарға қызмет көрсететін осындай жаңа кәсіпорын ашу жоспарланған», - дейді Серікжан Құнанбаев.
