Астана күніндегі концерттік бағдарламалардың билет құны 750 мен 100 мың теңге аралығында
АСТАНА. Маусымның 11-і. ҚазАқпарат - Қала күні мерекесінде өнер көрсететін барлық өнер жұлдыздарының билет құны халық үшін қолжетімді,
деп хабарлады Астана әкімдігінен.
Әлемге танымал өнер жұлдыздарының концерттік бағдарламасын шілденің 4-інде майталман пианист Денис Мацуев жеке концертімен «Қазақстан» орталық концерт залында бастайды. Қазіргі уақытта оның концерттерінің кестесі бірнеше жылға алдын ала дайындалады. Ол жылына 100-ден астам концерт беретін әлемдегі бірден бір өнер жұлдызы. Концерттің билет бағасы - 900-бен 4000 теңге аралығында.
Шілденің 5-інде дәл осы залда опера жұлдызы Дмитрий Хворостовскийдің композитор Игорь Крутоймен бірге «Дежавю» концерттік бағдарламасы өтеді. Билеттер бағасы 5 мың мен 100 мың теңге аралығында.
Ал шілденің 6-ына жоспарланған әнші, Ресейдің еңбек сіңіріген әртісі Александр Серовтің жеке концертіне кіру - 2 мың мен 6 мың теңге аралығында болмақ.
Танымал американдық джаз орындаушылар Николь Генри мен Кимберли Дэвистің концерті 750 мен 3500 теңге аралығында бағаланып отыр.
Қалтаңызда 1500-ден 10000 теңге аралығында ақшаңыз болса, онда шілденің 3-4-і күндері Бейбітшілік пен келісім сарайында басты рөлде ресейлік танымал актер Сергей Безруков ойнайтын «Басбұзар» музыкалық-поэтикалық спектакльді тамашалай аласыз.
Сонымен қатар шілденің 6-ында «Астана-Арена» стадионында қазақстандық, ресейлік, шетелдік өнер жұлдыздарының қатысуымен гала-концерт өтеді. Американдық әнші Ne'Yo мен Morandi, сондай-ақ «312», «А-Студио» топтары, Сергей Лазарев сынды эстрада жұлдыздары қатысатын «Асқақтай бер, Астана!» думанды кешіне кіру 1,5 мың теңге.
