Астана процесіне Ирак пен Ливан қосылуы мүмкін

НҰР-СҰЛТАН. ҚазАқпарат - Сирия бойынша Астана процесіне қатысуға Ирак пен Ливан елдері шақырылды, деп хабарлайды ҚазАқпарат тілшісі.

«Тараптар Астана форматының бақылаушылар санын арттыру мәселесін талқылады. Кеңесе келе, Сирияға көрші елдер Ирак пен Ливанды - Астана процесіне қатысуға шақыру келісілді», - деді келіссөздердің қорытындысы бойынша сөз сөйлеген ҚР Сыртқы істер бірінші вице-министрі Мұхтар Тілеуберді.

Кепілгер елдердің бірлескен мәлімдемесін оқыған Мұхтар Тілеуберді процеске қатысушы мемлекеттер Қазақстан Республикасының Тұңғыш Президенті - Елбасы Нұрсұлтан Назарбаевтың Астана форматын жолға қойған еңбегін ерекше атап өткенін айтты.

Еске сала кетсек, бүгін елордада Сирия бойынша Астана процесінің 12-ші раунды аяқталды.