Астана-Щучинск, Астана-Теміртау бағыттарында көлік қозғалысына шектеулер енгізілуі мүмкін

Ауа райы болжамына сәйкес, бүгін сағат 19:00-ден бастап Ақмола және Қарағанды ​​облыстарында метеорологиялық жағдайдың нашарлауы күтілуде, деп хабарлайды Kazinform.

ҚазАвтоЖол дерегіне сәйкес, қалың қар жауып, қатты жел соғуы мүмкін, салдарынан көрініс шектеледі. Мұндай ауа райының қолайсыздығы 8 қаңтар күнгі сағат 16.00-ге дейін сақталады деген болжам бар.

«Осыған байланысты жол қозғалысына қатысушылардың қауіпсіздігін қамтамасыз ету мақсатында Астана-Щучинск және Астана-Теміртау бағыттарында көлік қозғалысына шектеулер енгізілуі мүмкін екендігін хабарлаймыз.

Ауа-райы туралы ақпаратқа назар аударып, сапарыңызды алдын ала жоспарлауыңызды сұраймыз», — деп жазды ведомстводан.

Сондай-ақ, 1403 байланыс орталығы тәулік бойы жұмыс істейтінін естеріңізге саламыз. Бұл нөмір арқылы республикалық маңызы бар автожолдардағы ахуал жөніндегі ақпаратты алуға болады.

Айта кетейік, автожолдарда қысқы күтіп-ұстау жұмыстары қарқынды жүргізіліп, қар тазалау техникалары тәулік бойы жұмыс істейтін болады.