«Астана су арнасының» 4 қызметкері метан газынан уланып көз жұмды
НҰР-СҰЛТАН. ҚазАқпарат - Нұр-Сұлтан қаласында 4 адам метан газынан уланған. Бұл туралы ҚазАқпарат Төтенше жағдайлар комитетіне сілтеме жасап хабарлайды.
Оқиға елордадағы Оқушылар сарайының маңындағы құдықтардың бірінде болған. Алдын ала мәліметтерге қарағанда, уланғандардың барлығы көз жұмған.
Қала әкімі Бақыт Сұлтановтың айтуынша, төртеуі де - «Астана су арнасы» коммуналдық мекемесінің қызметкерлері.
«Өзімнің және әкімдіктің атынан марқұмдардың отбасына қайғырып көңіл айтамын. Әкімдік барлық қажетті көмекті көрсетеді. Тиісті қызметтерге егжей-тегжейлі тергеу жүргізіп, қайғылы оқиғаның себептерін анықтауды тапсырдым», - деп жазды қала басшысы Facebook парақшасында.
