Астана тұрғындары үшін инфляция мен тұтыну тауарлары бағасының өсуі үлкен проблема болып табылады - зерттеудің қорытындысы
АСТАНА. Желтоқсанның 21-і. ҚазАқпарат /Құралай Орынбекқызы/ - Астана тұрғындары үшін инфляция мен тұтыну тауарларының бағасының өсуі үлкен проблема болып табылады. Бұл туралы бүгін «Бәйтерек» Халықаралық медиа-орталығында өткен дөңгелек үстелде айтылды,
деп хабарлайды ҚазАқпарат тілшісі.
Астана қаласы Ішкі саясат басқармасының тапсырмасымен «Сарапшы» қоғамдық қоры кешенді әлеуметтік зерттеу өткізіп, елорданың үшінші секторының азаматтық қоғамның құрылу аясындағы дамуын қарастырды. Зерттеу мақсаты - Астана қаласының азаматтық қоғамының келешекте дамуы жөніндегі сарапшылар мен жұртшылық пікірін білу. Сауалнама ретінде жүргізілген іс-шараға елорданың 3 ауданынан 18 жастан асқан 600 адам қатысты. Сондай-ақ 60 сарапшы, оның ішінде БАҚ, ҮЕҰ өкілдері мен шенеуніктер қамтылды.
«Бүгінде Қазақстанда 25 мыңға жуық коммерциялық емес ұйым тіркелген. Олардың қатарында 10 саяси партия, 4 мыңнан астам діни ұйымдар, ондаған кәсіптік одақтар, 3 мыңға жуық БАҚ және 5 мыңға жуық ҮЕҰ бар. Сұраудың нәтижелері бойынша Астана тұрғындарының жартысынан көбі ҮЕҰ-дың қалада жұмыс істейтіндігі туралы ешқашан естімегені анықталды», деді әлеуметтану магистрі Любовь Сартакова.
Талдау тобының пікірінше, осы құрастырылған әдістемені елордада, сондай-ақ еліміздің басқа аймақтарында үшінші сектордың жай-күйіне мониторинг жасау үшін негіз ретінде алуға болады.
