«Астана» велокомандасы «Тур де Франс-2014» додасын жеңуді мақсат етіп қойды
АСТАНА. 9 қаңтар. ҚазАқпарат - «Astana Pro Team» велокомандасы «Тур де Франс -2014» додасында жеңіс тұғырынан көрінуге бел байлап отыр. Бұл туралы итальяндық Брешиадағы команданың ресми таныстырылымында велокоманданың бас менеджері Александр Винокуров мәлім етті.
«Өткен жылы біз «Джиро д'Италия» жарысын жеңу үшін жұмыла жұмыс істедік, алайда бұл оңайға түскен жоқ. Бірақ та біз көрсеткен күш-жігер Брешиадағы жеңіске алып келді. Сондықтан да бүгін осы жерде тұрып, «Тур де Франс-2014» додасы белестерін еңсеруге дайын екенімізді жария ету - үлкен мәртебе»,-деді А. Винокуров.
Өз кезегінде команда капитаны Винченцо Нибали шілдедегі «Тур де Франс» ұжымның негізгі мақсаты екенін атап өтті. Сонымен қатар «Милано - Сан-Ремо», «Льеж-Бастонь-Льеж», «Париж-Ницца», «Тиррено-Адриатико» және «Джиро д'Италия» жарыстарында жақсы нәтижеге қол жеткізуге мүмкіндік беретін тиісті бағдарлама әзірленген көрінеді.
