Астанада 3 күн ішінде 665 заңсыз мигрант анықталды - ІІД
АСТАНА. 17 мамыр. ҚазАқпарат /Жасұлан Аманбайұлы/ - «Заңсыз келуші» операциясының үш күні ішінде елордада көші-қон заңнамасын бұзған 665 шет ел азаматы әкімшілік жауапкершілікке тартылды.
Бұл туралы бүгін брифингте Астана қалалық ішкі істер департаменті мемлекеттік тіл және ақпарат бөлімінің бастығы Нұрділдә Ораз мәлім етті.
Мамырдың 11 мен 13 күндері аралығында өткізілген жедел-алдын алу шарасы көші-қон заңнамасын бұзған адамдарды анықтау мақсатында өткізілген болатын.
«Жедел-алдын алу шарасының 3 күндік қорытындысы бойынша, көші-қон полициясы қызметкерлері 665 шет ел азаматын әкімшілік жауапкершілікке тартып, оның 56 әкімшілік сотпен елден шығарылды. Жеке тұлғасын анықтау үшін ІІД Қабылдап-тарату орнына ТМД-нің 74 азаматы орналастырылды»,-деп атап көрсетті Н. Ораз.
Оның айтуынша, шара барысында ІІД криминалдық полиция қызметкерлері іздеуде жүрген 2 қылмыскерді ұстаған.
