Астанада 5 мектепке жапсарлас ғимарат салынып, 2 балабақша пайдалануға беріледі
АСТАНА. ҚазАқпарат - Биыл елордада 5 мектепке жапсарлас ғимарат салынып, 2 балабақша пайдалануға беріледі. Бұл туралы агенттік тілшісінің ресми сауалына орай Астана қалалық сәулет және қала құрылысы басқармасынан мәлім етті, деп хабарлайды ҚазАқпарат.
Басқарма ақпаратына сәйкес, ағымдағы жылы ертеректе пайдалануға берілген 5 мектепке, атап айтқанда, Қабанбай батыр дағылы бойындағы №17 мектеп-гимназияға, Ж.Жирентаев көшесі бойындағы №22 мектеп-гимназияға, Абылай хан даңғылы бойындағы №32 мектеп-гимназияға, Күйші Дина көшесі бойындағы №37 орта мектепке және Кенесары көшесі бойындағы №16 орта мектепке жапсарлас ғимараттар салынады.
Мұнан бөлек, биыл 2 балабақша салынады. Нақты айтқанда, Сарайшық көшесінен оңтүстікке қарай Жұмабаев көшесінен батысқа қарай жылу желісі бар 240 орындық балабақша және Иманов көшесі, Макаренко, Радищес тұйық көшелері қиылысы ауданында да 240 орындық балабақша бой көтереді.
