Астанада адасып кеткен балалар ата-анасына қайтарылды - ІІД
АСТАНА. ҚазАқпарат - Астанада адасқан балалардың ата-анасы анықталды. Бұл туралы «ҚазАқпарат» тілшісіне Астана ІІД баспасөз хатшысы Софья Қылышбекова хабарлады.
«Студенттік паркте учаскелік инспектор кішкентай үш баланың жүргенін байқап қалған. Екі қыз бала төрт жаста, ал ұл бала бес жаста екен. Ол жерде балалар ата-анасының қарауынсыз болды»,-деп нақтылады С. Қылышбекова.
Анықталғандай, балалар өздерінің үйлерінің ауласында ойнап жүрген, кейіннен ата-анасының рұқсатынсыз өз еріктерімен саябаққа кетіп қалған екен.
«Балалар кеше 20:30 кезінде табылды. Полицияға сол төңіректе жүрген адамдар кешқұрым уақытта саябақта балалар ата-анасының қарауынсыз ойнап жүргенін хабарлады. Осы ақпараттан кейін саябаққа біздің учаскелік қызметкер барып, балаларды полиция бөлімшесіне жеткізді. Содан кейін балалар ата-аналарына тапсырылып, олармен тиісті түсіндіру шаралары жүргізілді»,-деді С. Қылышбекова.
Айта кетейік, әлеуметтік желіде адасып кеткен балалардың фотосуреті таратылып, олардың ата-анасы іздестіріліп жатқаны хабарланған еді.
