Астанада алдағы күндері қандай мәдени шаралар өтеді
НҰР-СҰЛТАН. ҚазАқпарат - Нұр-Сұлтан қаласының мәдени ошақтары алдағы демалыс күндері қала тұрғындары мен қонақтарына арнап премьералық қойылымдар, 8 Наурыз мерекесі қарсаңында концерттер, көрмелер мен экскурсиялар өткізеді, деп хабарлайды ҚазАқпарат елорда әкімдігінің ресми сайтына сілтеме жасап.
Атап айтқанда, «М.Горький атындағы мемлекеттік академиялық орыс драма театры» сахнасында 6-7 наурыз күндері сағат 18:00-де В.Шукшиннің әңгімелері бойынша «Светлые думы» қойылымының премьерасы өтеді.
«Наз» мемлекеттік би театры 5 наурыз күні сағат 18:00-де халықаралық әйелдер мерекесіне орай «Сыйынар ем Ана деген тәңірге!» тақырыбында концерт өткізеді.
«Сәкен Сейфуллин мұражайы» 5 наурыз күні Әлихан Бөкейхановтың туғанына 155 жыл толуына орай «Ұлт көсемі – Әлихан Бөкейханов» атты онлайн-дәріс ұйымдастырады. Дәрісті Instagram желісіндегі Seifullin_museum және bizbirgemiz парақшаларынан көруге болады.
Мемлекеттік академиялық филармония 6 наурыз күні «Жұлдыз болғың келсе» атты концертіне шақырса, 7 наурызда «Жан Анам» атты концертін қояды.
Өз кезегінде «Қуыршақ театры» 5 наурыз күні сағат 14:00-де, 16:00-де Т. Хасанғалиеваның «Ана құдыреті» ертегісін жұртшылық назарына ұсынса, 6 наурыз күні 12:00, 14:00, 16:00 уақытында Р. Киплингтің «Маугли» шығармасын орындайды.
«Бейбітшілік және келісім сарайы» бірқатар іс-шаралар кешенін өткізеді. Нақтырақ тоқталсақ, 6 наурызға дейін күнделікті 09:30-18:00 аралығында «Туған жер» атты балалар мен жасөспірімдер студиясының хореография, хор, актерлік шеберлік сабақтары ұйымдастырылады. Сондай-ақ 7 наурызға дейін 10:00-18:00 аралығында күнделікті елорда тұрғындары мен қонақтары үшін экскурсиялар болады. Сол сияқты дәл осы аралықта «Жаңа көзқарас» атты қазақстандық бейнелеу өнерінің көрмесі ұйымдастырылады. 6 наурыз күні Almaty Symphony Orchestra ұжымының музыкалық директоры Ержан Құлыбаевтың қатысуымен «ВИРТУОЗДАР» концерті болады.
«Тәуелсіздік сарайы» да бірқатар көрме өткізеді: 2-7 наурыз күндері 10:00-18:00 аралығында «Елорда бейнесі» көркемөнер, «Нұр-Сұлтан қаласына сыйлықтар», «Uly Dala Juregi» көрмелері, сондай-ақ экскурсиялар жоспарланған.
«Бәйтерек» ғимаратында да қала жұртшылығын экскурсиялар күтіп тұр.
«Орталықтандырылған кітапханалар жүйесі» ғимаратында 5 наурыз күні сағат 12:00-де «О, әйел, сенен басқа сұлу жоқ!..», «Әйел бейнесі, әдемі бейне», ал 7 наурызда «Әйел-Ана, Әйел-Өмір, Әйел-Жыр!» атты іс-шара ұйымдастырылады.
«АЛЖИР» мемориалды-мұражай кешені» 5 наурыз күні «Алаш қозғалысының көсемі Әлихан Бөкейханов» атты онлайн көрме өткізеді. Көрмені мына парақшалардан көруге болады. Facebook: Музей АЛЖИР; Instagram: museumalzhir; Youtube: Museum ALZHIR Astana.
«Nomad City Hall» сахнасында 6-7 наурыз күндері сағат 17:00-де Әзірбайжан Мәмбетов атындағы мемлекеттік драма және комедия театрының мерекелік сый тартуы және «Қош, махаббат» спектаклі болады.
«Жастар театры» 6-7 наурыз күндері С.Дүйсенбиевтің «Махаббат миниатюралары» атты театрландырылған концертін ұсынады.
Айта кетейік, аталған іс-шаралардың барлығы санитарлық-эпидемиологиялық талаптарды сақтай отырып өткізіледі.
