Астанада Америкадан жеткізілген емен ағаштары өсіп жатыр - Джордж Крол
АЛМАТЫ. ҚазАқпарат - Халықаралық Жер күні аясында Астанада Қазақстандағы АҚШ елшілігі мен Алматы ауданының әкімдігі ағаш отырғызу рәсімін өткізді, деп хабарлайды ҚазАқпарат тілшісі.
Әкімдік пен елшіліктің бірлескен бастамасымен елорда көшелерінің біріне 15 түп қарағай отырғызылды.
«Өздеріңізге белгілі, жыл сайын сәуір айының соңында Халықаралық Жер күні аталып өтеді. Сондай-ақ, Америкада ауа сапасы апталығы өтеді. Өйткені АҚШ-тың бірнеше қаласында қоршаған орта мен ауаның ластануы мәселелері бар. Ағаштар - ауаны тазалаудың таптырмас құралы, сондықтан америкалықтар көбірек ағаш отырғызуға тырысады. Қазақстан Президенті де арнайы бағдарлама құрып, Астананың айналасына миллиондаған ағаш отырғызды. Бұл нағыз тамаша бастама», - деді Америка Құрама Штаттарының Қазақстандағы елшісі Джордж Крол.
Джордж Крол жыл сайын елшілік қызметкерлерінің ағаш отырғызуға белсене қатысатынын, АҚШ елшілігі аумағында 400-ге жуық ағаш бар екенін атап өтті. Олардың арасында қарағай, қайың, тіпті Солтүстік Дакота штатынан жеткізілген емендер де бар.
«Былтыр ЭКСПО-2017 көрмесіне АҚШ-тан президенттік делегация келді. Сонда АҚШ Конгресінің депутаты Солтүстік Дакота штатынан 30-40 түп емен көшетін әкелді. Бұл көшеттерді елшілікке және жақында ашылатын Астананың ботаникалық бағына отырғыздық. Солтүстік Дакота мен Астананың климаттары ұқсас. Сондықтан, біздің көшеттеріміз болашақта алып ағашқа айналады деп үміттенеміз», - деді ол.
Сондай-ақ, Джордж Крол Астанаға арнайы ауысып келген АҚШ Ауыл шаруашылығы министрлігі өкілін таныстырды.
«Қаңтар айында Қазақстан Президенті Нұрсұлтан Назарбаев АҚШ-қа сапарлап, Дональд Трамппен кездескен болатын. Олар АҚШ пен Қазақстан арасындағы климат, ауыл шаруашылығы бойынша қарым-қатынасты дамытуға уағдаласты. Рэйчел - агрономия мен мал шаруашылығы бойынша сарапшы, ол Қазақстанның барлық өңірлерін аралап шықты», - деді Дж. Крол.
