Астанада АӨСШК штаб-пәтерінің жаңа ғимараты салынады
АСТАНА. KAZINFORM – Алдағы уақытта елордада Азиядағы өзара іс-қимыл және сенім шаралары жөніндегі кеңестің заманауи штаб-пәтері есігін айқара ашпақ. Бүгін ауқымды жобаның іргетасын қалау рәсімі өтті.
Бұл жобаның алғашқы алғышарттары осыдан екі жыл бұрын жасалған болатын. ҚР Президенті Қасым-Жомарт Тоқаевтың тапсырмасы бойынша Астана қаласының әкімдігі штаб-пәтер ғимаратының құрылысына елорданың жаңа дамып келе жатқан және перспективалы бөлігінде жер учаскесін бөлген еді. Азиядағы өзара іс-қимыл және сенім шаралары жөніндегі кеңесті трансформациялау туралы шешімді іске асыру мақсатында АӨСШК Бас хатшысы Қайрат Сарыбай және «Sensata Group» компаниялар тобының басшылығы АӨСШК штаб-пәтері ғимаратының құрылысы туралы үшжақты меморандумға қол қойған-ды. Астана қаласының әкімдігі осы келісімнің тағы бір қатысушысы екенін атап өткен жөн.
Бүгін жаңа ғимараттың іргетасын қалау рәсімінде АӨСШК хатшылығының болашақ қызметкерлеріне жолдау ретінде саналатын «уақыт капсуласы» салынды.
Айта кетейік, ғимарат 4 қабаттан тұрады. Жалпы ауданы 4 мың шаршы метрді құрайды. Бұл ғимараттың басты артықшылығы көпфункционалды зал болады. Онда басқару органдары да, консультативтік сипаттағы органдар да бас қоса алады. Мұнда көптеген конференциялар, семинарлар, оқыту процестері өткізілмек.
«25 жылдан кейін әріптестеріміз бұл капсуланы ашып, ұйымымыздың бүгінгі тыныс-тіршілігімен таныса алады деп үміттенемін. Менің ойымша, 25 жылдан кейін біздің ізбасарларымыз келесі 25 жылға өз жазбаларын жаза алады және бұл эстафета ұрпақтан-ұрпаққа жалғасады. Ұйымның жұмысы жүйеленіп, дамудың даңғыл жолына түскенін көріп отырмыз. Бүгінде жаһанда Азияның рөлі айтарлықтай артып келе жатқанын атап өткен жөн», - деді АӨСШК Бас хатшысы Қайрат Сарыбай.
Өз кезегінде ҚР Сыртқы істер министрінің орынбасары Әлібек Бақаев айтулы оқиғаның маңыздылығын атап өтті.
«Азиядағы өзара іс-қимыл және сенім шаралары кеңесінің жаңа дербес штаб-пәтерінің «алғашқы тасын қалау» рәсімі құтты болсын! Қазақстанның Азия кеңесін шақыру бастамасы, бүгін өзінің жаңа, мақтан тұтарлық қадамын басуда. Бұл іс-шара Мемлекет басшысы Қасым-Жомарт Тоқаев берген Азия кеңесіне штаб-пәтерін салу бойынша тапсырмасының орындалуы және жеке қолдауының көрінісі. Осы ретте, Азия кеңесіне мүше мемлекеттердің және Бас хатшысы Қайрат Шораұлы басқаратын Азия кеңесі Хатшылығының қосыла жүргізген дәйекті жұмысына ризашылығымызды білдіреміз», - деді ол.
Айта кетейік, құрылысқа жауапты компания ғимаратты ең озық жасыл технологиялармен жабдықтауға уәде берген. Тіпті, жаңа штаб-пәтер Қазақстан астанасының сәулетіндегі көрнекті ғимараттардың бірі болатынына сендіріп отыр. Әзірге АӨСШК Астана халықаралық қаржы орталығында орналасқан.
