Астанада әскери психологтар жеке құрамның психологиялық дайындық әдістерін тәжірибе түрінде пысықтады

АСТАНА. 22 қазан. ҚазАқпарат - Астанадағы десантты-шабуылдаушылар бригадасында Қазақстан Республикасы Қарулы Күштері Құрлық әскерлері офицер-психологтарының жиыны өтуде. Әскер түрінің барлық бөлімдері мен құрамаларынан жиналған жүзге жуық психолог жиынның екінші күні өздерінің психологиялық және дене даярлығы төзімділіктерін сынға салды.

Бұл туралы ҚР Қорғаныс министрлігінің баспасөз қызметінен хабарланды.

Әскери психологтар алғаш рет стрестік жағдайда өзін-өзі бақылау және жеке құрамның психологиялық дайындық әдістерін тәжірибе түрінде пысықтады. Тоқсан пайызға жуығы әйелдерден тұратын психологтар танк астына түсіп, гранат лақтыру сияқты күрделі іс-қимылдарды жасады. Сонымен қатар, олар от жолақты жолдан тұратын түрлі кедергілерді жүріп өту арқылы өздерінің жан-жақты даярлықтарын көрсетті.

«Бұл жиын әскери қызметшілердің ұйымдастыру-әдістемелік және тәжірибелік дайындығын жетілдіру мен қалыптастыру үшін жыл сайын өтіп тұрады. Жиынға қатысушылар болуы мүмкін психогендік шығындарды анықтап, олардың алдын алуға үйренеді. Әскери психологтар осындай жиындардан өз шеберліктерін шыңдап, жинаған тәжірибелерін күнделікті қызметте пайдаланары сөзсіз. Бұған дейін әскери психологтар тек теория түрінде сыннан өтсе, биыл қолдарына қару алып, түрлі жауынгерлік тапсырмаларды орындауда», - деді жиынға басшылық жасаған ҚР ҚК Құрлық әскерлері бас қолбасшысының тәрбие және әлеуметтік-құқықтық жұмыстар жөніндегі орынбасары полковник Жұмабек Хасенов.

Жиын шеңберінде жауынгерлік жағдайдағы жедел психологиялық диагностика көрсететін және қажетті психологиялық жәрдем жасайтын оқу нүктелері де ұйымдастырылған.