Астанада автокөліктегі өрттің алдын алуға бағытталған акция өтуде

 АСТАНА. 25 желтоқсан. ҚазАқпарат - Елордалық құтқарушылар бір ай бойы автокөліктердің өртенуінің алдын алуға бағытталған акция өткізеді. Статистикалық мәліметтерге сәйкес биыл Астанада автокөліктердегі өрттердің саны артып, 173 көлік өртенген. Бұл туралы astana.kz сайтына ТЖД баспасөз қызметінен хабарлады.

Ведомствоның хабарлауынша, автокөліктің өртенуінің басты себептерінің қатарына қысқа тұйықталу, жылыту жүйесінің ауытқуы мен отты абайсыз қолдану жатады.

«Астана қаласы бойынша статистикалық мәліметтерге сәйкес, 2013 жылы автокөліктердегі өрттердің саны өскені байқалады. Осылайша, жыл басынан бері Астана қаласында 173 өрт орын алған. Материалдық залалдың көлемі 12 млн. теңгеден асқан»,- делінген ТЖД баспасөз қызметінің хабарламасында.

Осыған байланысты, Астана қаласы ТЖД Сарыарқа аудандық ТЖБ мен Астана қаласы ӘПБ бірлесіп автокөліктердегі өрттің алдын алуға бағытталған бірқатар үгіт-насихат іс-шараларын жүргізуді қолға алды. Атап айтқанда, Басқармалардың өкілдері мен «Жас Отан» жастар қанатының мүшелері көліктердегі өрттің алдын алуға бағытталған үгіт-насихат парақшаларын таратты.

Сонымен қатар, автокөлік иелері көп жиналатын ғимараттарда (мамандандырылған автокөлік ХҚКО, көлік құралдарын тіркеуге қою орындарында) арнайы плакаттар ілінген. Осы орындарда өрттің алдын алуға бағытталған бейнематериалдар көрсетіледі. Автокөліктердегі өрттердің алдын алуға бағытталған іс-шара 12 желтоқсанда басталып, үстіміздегі жылдың соңына дейін жалғасады.