Астанада БҚО мен Атырау облыстары ауыл шаруашылығы өнімдерінің жәрмеңкесі өтуде

АСТАНА. 12 қазан. ҚазАқпарат - Бүгін Астана қаласының орталық алаңында өткен Батыс Қазақстан және Атырау облыстарының ауыл шаруашылығы өнімдерінің жәрмеңкесіне елорда әкімі Иманғали Тасмағамбетов,

делегацияларды бастап келген БҚО әкімі Нұрлан Ноғаев пен Атырау облысы әкімінің орынбасары Ғұмар Дүйсембаев келіп қатысты.

Жәрмеңкеге Батыс Қазақстан облысының 12 ауданынан, Атырау облысының 7 ауданынан және Орал мен Атырау қалаларынан ауыл шаруашылығы өнімдерін өндірушілер келді. Олар жалпы көлемі 800 тоннаға жуық өнімдер әкелген. Сонымен қатар, ауыл шаруашылығы өнімдерін қайта өңдеумен айналысатын 13 кәсіпорын 5 тонна ет, қалбырланған балық және көкөніс, 5 тонна шұжық, 5 тонна еттің дүмбіл өнімдерін, 2 мың литр өсімдік майын, 100 мың дана жұмыртқа, 5 мың литр қымыз және 200 келі мия тамырынан жасалған өнімдерді Астана тұрғындарына ұсынды.

«Бүгінгі Батыс Қазақстан мен Атырау облыстарының әкелген өнімдеріне елордалықтар дән риза. Әрине, әр өңірдің өз ерекшелігі бар. Мәселен Атырау облысы 40 тонна балық өнімдерін әкеліп отыр. Екі облыстың әкелген барлық өнімдері Астана базарларының бағасынан 20-25 пайызға арзан», - деп атап өтті Астана қаласының әкімі И. Тасмағамбетов.

Сонымен қатар, ол бұл шараның басты мақсаты ел мен елорданы, елорда мен елді жақындату екенін баса айтты.