Астанада бүлдіршіндер балабақшаға тегін бара бастады
АСТАНА. ҚазАқпарат - Астанада аз қамтылған көпбалалы отбасыларда тұратын бүлдіршіндер мектепке дейінгі мекемелерге тегін баратын болады, деп хабарлайды ҚазАқпарат.
Елорда әкімдігінің баспасөз қызметінен мәлім еткендей, мұндай жеңілдікті алғашқы болып Алматы ауданының әкімдігі жасап отыр. «20 Izgi Qadam» қайырымдылық акциясы аудан әкімі Әділбек Сәрсембаевтың бастамасымен қолға алынған. Бүгінде 20 бүлдіршінге жекеменшік балабақшаға тегін баруға мүмкіндік беретін сертификаттар табыс етілген. «Осы іске бей-жай қарамаған басшылықты, жекеменшік балабақшаның құрылтайшыларына алғысымды білдіргім келеді. Балаларымыз мемлекеттің лайықты азаматы болып өсіп, мейірімді, бойына тек ең жақсы қасиеттерді сіңіріп өседі деп үміттенемін», - деді Алматы ауданы әкімінің орынбасары Тынысбек Арашапов.
Сертификаттарды алдағы уақытта да беру жоспарланған.
Балабақшалар жаңа тәрбиеленушілерін 1 желтоқсаннан бастап қабылдай бастайды.
Бұған дейін Алматы ауданында балаларын балабақшаларға беруге мүмкіндіктері жоқ отбасылардың тізімі жасалып жатқанын жазған болатынбыз.
