Астанада «Елбасы. Маңғыстау» атты кітаптың тұсауы кесілді
МАҢҒЫСТАУ ОБЛЫСЫ. ҚазАқпарат - Шілде айының 1 - 4 аралығында маңғыстаулық өнерпаздар Астана қаласының 20 жылдық мерекесіне орай «Жаңғырған Маңғыстаудан - жасампаз Астанаға» атты мәдени шаралар ұйымдастырып, бас қаламыздағы думанды кештердің көркін қыздыруда. Бұл туралы облыс әкімдігінен хабарлады.
1-шілде «Ұлттық домбыра» күні мерекесіне Абыл Тарақұлы атындағы ұлт аспаптар оркестрі Қазақ елі алаңын әуелеген әнмен көмкеріп, күмбірлеген күйге бөледі.
Мереке қарсаңында «Өңірлердің Астанаға тартуы» бағдарламасы аясында Маңғыстау облысы «Достық үйін» сыйға тартып, Астананың 20 жылдығына ерекше тарту жасаған болатын.
«Астана - жалпыұлттық бірлік пен келісім қаласы», - деген Ұлт Көшбасшысының сөзін маңғыстаулықтар сыйлаған маңғаз ғимарат айшықтап тұрғандай. Достық үйіне арнайы барып, сәулеттік ерекешелігімен танысып, ішін аралаған Мемлекет басшысы Нұрсұлтан Назарбаев елорданың этномәдени орталықтарының өкілдерімен және Маңғыстау облысының көрнекті қоғам қайраткерлерімен әңгімелесті.
«Еліміздің барлық өңірінде Достық үйлері бар. Онда облыстардың этномәдени бірлестіктері жұмыс істейді. Енді бас қаланың да Достық үйі болады. Сіздерді осы айтулы оқиғамен құттықтаймын!», - деді Нұрсұлтан Назарбаев.
Маңғыстау облысының әкімі Е.Тоғжанов Мемлекет басшысына Достық үйінің эскиздік жобасын таныстырды. Онда кітапхана, музей, халықтық қолданбалы өнер шеберханалары, конференц-зал және тілдерді оқыту орталығы үшін арнайы орындар қарастырылған. Ғимараттың жалпы аумағы - 4 мың шаршы метр.
Сондай-ақ кездесу барысында маңғыстаулық қоғам қайраткерлері Мемлекет басшысы Н.Ә.Назарбаевқа «Елбасы. Маңғыстау» атты жаңа кітапты тарту етті. 1 мың данамен шыққан 5 бөлімнен тұратын тарихи хронологиялық кітап - Елбасының қамқорлығымен Маңғыстау өлкесінің облыс мәртебесіне қайта ие болуы, тәуелсіздік жылдарындағы облыстың гүлденуі және киелі түбектің өткен тарихы жайлы сыр шертеді.
Бұл публицистикалық повесть - Қазақстан Республикасының Тұңғыш Президенті - Елбасы кітапханасы мен Қазақстан Республикасының Тұңғыш Президенті Қоры ұйымдастырған «Қазақстан Тәуелсіздігі және Елбасы» республикалық конкурсында жүлделі екінші орынға ие болды.
Маңғыстаулық өнерпаздар ұсынған мәдени кеш бүгін «Астана» концерт залында жалғасын тапты. «Жаңғырған Маңғыстаудан - жасампаз Астанаға» атты өнер шеберлерінің мерекелік концерті қойылды. Онда Абыл Тарақұлы атындағы қазақ оркестрі, «Жорға» би ансамблі, мәдениет саласының үздіктері Асқар, Асанәлі Көшеровтер және «Мен Қазақпын!» мегажобасының бас жүлдегері Оспан Құлсымақ сынды бірқатар өнер майталмандары өнер көрсетті. Сондай- ақ елордалық жұртшылыққа «Табиғаты таңғажайып - мұралы маңғыстау» облыстық тарихи-өлкетану музейінің көрмесі ұсынылды.
Шара барысында сөз алған Маңғыстау облысының әкімі Ералы Тоғжанов: «Президентіміз Нұрсұлтан Әбішұлы Назарбаев атап өткендей: «Жаңа Астана - тәуелсіз Қазақстан үшін жарқын келешектің нышаны», «Астана - Отанымыздың жүрегі, тәуелсіздігіміздің тірегі!», - деді ол.
Елбасының саяси көрегендігімен бас қала атанған, еліміздің бойтұмарына айналған Астана тұрақты дамудың, өсу мен өркендеудің даңғыл жолына түсті. Бүгінде көзді ашып - жұмғанша миллионнан астам тұрғыны бар болашаққа бой түзеген арман қалаға айналды.
Олай болса, Астана - егемендігіміз бен тәуелсіздігіміздің символы, Отанымыздың тірегі мен мақтанышы. Маңғыстау жұрты Елбасымыздың мән-маңызы зор бағдарламаларына әрқашан қолдау білдіріп, елордамызды, елімізді көркейте түсуге атсалысып, үлес қосуды үлкен абырой, міндет санайды.
4 шілдеде Астанада «Этно ауыл» ұлттық мәдени кешені мен «Қазанат» ипподромында Маңғыстау облысы шығармашылық ұжымдарының концерті өтеді.
Сондай-ақ, Қазақ оркестрлерінің «Серпер» V Республикалық фестивалі аясында Абыл Тарақұлы атындағы ұлт аспаптар оркестрінің концерттік бағдарламасы елордалық өнер сүйер қауымның назарына ұсынылмақ.
