Астанада Фариза Оңғарсынова тұрған үйдің қа­бырғасына мемориалдық тақ­та қойылды

АСТАНА. ҚазАқпарат - Апта соңындағы айтулы жаңалықтардың бірі қазақтың аяулы ақын қызы Фариза Оңғарсынқызы өмірінің соң­ғы жылдары тұрған үйінің қа­бырғасына мемориалдық тақ­таның қойылуы болды.

Аста­наның бас көшелерінің біріне Дінмұхамед Қонаевтың есімі берілгені белгілі. Сол көше бо­йын­дағы еңселі ғимаратта ақын 2009-2014 жылдары тұрған екен. Шарапатты шараның тізгінін ұстаған Парламент Мәжілісінің депутаты Қуаныш Сұлтанов келген қонақтардың келелі пікірлерін тыңдау үшін кезегімен сөз беріп тұрды.

«Жаңа айтылғандай өткен ғасырдың 70-ші жылдарының аяғында, 80-жылдарының соңында қазақ әдебиетіне керемет бір тол­қын келді. Олар шетінен талант­ты еді. Солардың ішінде ерекше көзге түскен, келе салып бір-екі жылдың ішінде өзін мойындатқан Фаризаның болмысы бөлек еді. Фаризаға біз еш уақытта қыз ба­ла деп қараған жоқпыз. Бірге жүрген досымыз, замандасымыз деп қарадық. Әсіресе, Астанаға келгеннен кейін бауырмал рухани сананың өкілдері бір ауыл болып кеттік. Қазір Фаризасыз сол ауылдың бір кірпіші кем секілді. Мұқағали қалай жасаса, Тұманбай қалай жасаса, Сағи Жиенбаев қалай жасаса Фариза да солай қазақ тарихында жасай береді. Біз оған сенімдіміз», - деді алғаш болып сөз алған жазушы, Фаризаның жанашыр ағаларының бірі, Мемлекеттік сыйлықтың лау­реаты Әкім Тарази.

Естелік тақтаның ашылу сал­танатына ел ағалары да ат­­ба­сын бұрғанын айта кетсек дей­міз. Олардың қатарында мем­лекет және қоғам қайраткері Өмірбек Байгелди, Мәжіліс депутаты Оразкүл Асан­ғазы, сенатор Бірғаным Әйтімова, «Еге­мен Қазақстан» РГ» АҚ прези­денті Сауытбек Абдрахманов, С.Сейфуллин мұражайының директоры, белгілі ақын Несіпбек Айтұлы, айтулы жыр дүлдүлі Серік Тұрғынбекұлы мен Оңайгүл Тұржан бар.

Алаштың ақын қызына деген ізгі ілтипаттарын ағалары ағынан жарыла сөзбен жеткізсе, өлең өлкесінде өкшесін басқан іні-сіңлілері жырмен жолдады. Тақтаның лентасын қию құрметіне Әкім Тарази мен Өмірбек Байгелди ие болды, деп жазады «Егемен Қазақстан» басылымы.