Астанада қаңтар айында 600-ден астам пәтер пайдалануға берілген
АСТАНА. ҚазАқпарат - Биыл Астанада 600-ден астам пәтер пайдалануға берілді. Бұл туралы қалалық Статистика департаментінен хабарлады, деп жазады елорда әкімдігінің ресми сайтында.
«Барлық қаржыландыру көздерінің есебінен жалпы ауданы 94 612 шаршы метрлік 633 пәтер пайдалануға берілді. Бұл 2013 жылғы қаңтар айындағы деңгейден 0,7%-ға төмен. Жекелеген үй құрылысымен айналысушылар жалпы ауданы 6 516 шаршы метрді құрайтын тұрғын үй салған, бұл 2013 жылғы қаңтар айындағы деңгейімен салыстырғанда - 114,2%. Жалпы іске қосылған тұрғын үйлердегі жеке тұрғын үйдің үлесі 2013 жылғы қаңтардағы деңгейі 6 пайызбен салыстырғанда 6,9 пайызды құрады», - делінген хабарламада.
Айта кетейік, елордада 2014 жылдың алғашқы айында тұрғын үйлердің жалпы ауданының 1 шаршы метрінің орташа нақты құны 144,8 мың теңгені құрады (2013 жылғы қаңтарда 96,2 мың теңге болған). Ал пайдалы ауданының 1 шаршы метр құрылысының орташа нақты құны 203 мың теңгеге жетті (2013 жылғы қаңтарда - 129,1 мың теңге). Оның ішінде жеке салушылармен салынған үйлерде ол 99 мың теңгені құрады.
Сондай-ақ, осы кезеңде тұрғын үй құрылысына 4 912,7 млн. теңге жұмсалды, бұл 2013 жылғы қаңтардағы деңгейіне қатысты 154,5% құрады. Негізгі капиталға салынған инвестициялардың жалпы көлемінде тұрғын үй құрылысында игерілген қаражаттар үлесі 51,4%-ға жетті.
