Астанада кәріз люктарын ұрлаған 3 адам ұсталды
АСТАНА. ҚазАқпарат - Астана қаласының тәртіп сақшылары кәріз люктарын жымқырып, пайда көрмек болған Ақмола облысының үш тұрғынын қолға түсірді, деп хабарлайды «ҚазАқпарат» ХАА тілшісі Астана қаласының ІІД баспасөз қызметіне сілтеме жасап.
Ұрлық оқиғасы 2 желтоқсан күні сағат түнгі 03:00 шамасында тіркелген.
«Ақмола облысының 20, 33 және 58 жастағы үш тұрғыны ұрланған люктарды металл қабылдайтын пунктке өткізбек болған жерінен қолға түсті. Алматы аудандық ІІБ-да аталған жағдайға қатысты ҚР ҚК-нің 188-бабы (ұрлық) бойынша қылмыстық іс қозғады», - деп хабарлайды ведомствоның баспасөз қызметінен.
Тергеу барысында ұсталған адамдардан 14 кәріз люгы тәркіленген. Қазіргі уақытта құқық қорғаушылар күдіктілердің өзге қылмыстарға қатысы бар-жоғы анықталып жатыр.
Айта кетсек, бүгінгі таңда Астана қаласының ІІД-де қажетті құжаттарсыз металл қабылдайтын пунктерді тексеретін және кәріз люктарын, қара және түсті металлдың ұрлануының алдын алуға бағытталған арнайы топ жұмыс жүргізіп жатыр.
