Астанада қазақ тілінен өзге ұлт оқушылары арасында қашықтан өткізілетін ІІІ республикалық олимпиаданың жабылуы болды

АСТАНА. Қаңтардың 12-сі. ҚазАқпарат /Құралай Жолдыбаева/ - Қаңтардың 10-ында Астана қаласының «Данияр» қонақүйінде қазақ тілінен өзге ұлт оқушылары арасында «Тіл – мемлекет тәуелсіздігінің символы» атты қашықтан өткізілетін ІІІ республикалық олимпиаданың жабылуы болды,

деп хабарлайды ҚазАқпарат тілшісі.Бұған дейін хабарланғандай, аталмыш шара «Қазақстан Республикасындағы тілдер туралы» Заңын, Тілдерді қолдану мен дамытудың 2001-2010 жылдарға арналған мемлекеттік бағдарламасын тиімді іске асыру, мемлекеттік тілді қолданудың басты бағыттарын анықтау және білім беру жүйесінде оны оқып-үйрену сапасын арттыру мақсатында ҚР Білім және ғылым министрлігінің «Дарын» ғылыми-тәжірибелік орталығы ҚР Мәдениет және ақпарат министрлігі Тіл комитетінің қолдауымен ұйымдастырды. Білім жарысына республиканың 6 аймағынан 5-10 сыныптардың 33 оқушысы қатысты. Нәтижесінде ІІІ орынды Людмила Исупова, Лилия Иванова, Оля Лутавинова алды. Ал ІІ орын Данил Ларионов пен Екатерина Кимге бұйырса, бас жүлдеге Динара Матрасулова ие болды. Сондай-ақ Исмаилова Разуна олимпиадада «Ең жас қатысушы» деп танылды.«Бұл олимпиаданы осымен 3-ші рет «Дарын» білім орталығы ұйымдастырып отыр. Тест жылдан-жылға өзгертіліп, ал талаптары сақталып келеді. Осы жолы балалардың мүмкіндігі мен білімін ескере отырып, біз қазақ тілі тапсырмаларын күрделендіруге тырыстық. Сонымен бірге, аталмыш олимпиаданың мақсаты ? мемлекеттік тілді рухани даму және қарым-қатынас құралы ретінде еркін меңгеретін лингвистикалық қабілеті жоғары және қазақ тілін үйренуге талаптанатын өзге ұлт оқушыларын анықтап, оларды әрі қарай дамыту», - деді Л.Н.Гумилев атындағы Еуразия Ұлттық университеті Практикалық қазақ тілі кафедрасының меңгерушісі, филология ғылымдарының докторы Зейнехан Күзекова.