Астанада Қазақстан дінтанушыларының үшінші форумы болды

АСТАНА. 13 қараша. ҚазАқпарат - Астана қаласында Қазақстан Республикасы Дін істері агенттігінің ұйымдастыруымен Қазақстан дінтанушыларының «Зайырлы мемлекеттегі діннің рөлі» атты үшінші форумы болып өтті.

Іс-шараға мемлекеттік органдардың өкілдері, белгілі қазақстандық дінтанушы ғалымдар, теологтар, орта мектептердің «Дінтану негіздері» пәні мұғалімдері, жоғары оқу орындарының оқытушылары, діни бірлестіктердің, қоғамдық ұйымдар мен бұқаралық ақпарат құралдарының өкілдері қатысып, сөз сөйледі. Қазақстан дінтанушыларының жыл сайынғы форумы биыл пленарлық отырыстан басталып, онда Форумның негізгі тақырыбы талқыға салынды. Одан кейін төрт секциялық отырыс жалғасын тауып, онда зайырлы мемлекеттегі діни саясаттың маңызды мәселелері қозғалды. Форумда Қазақстан Республикасы Әкімшілігі Басшысының орынбасары Бағлан Майлыбаев құттықтау сөз сөйледі. «Зайырлы мемлекет және зайырлы қоғам Мемлекет басшысы Нұрсұтан Назарбаевтың «Қазақстан-2050» Стратегиясында белгіленген негізгі құндылықтардың бірі болып табылады. Қазақстан халқы Ассамблеясының ХХ сессиясында Мемлекет басшысы «біздің тарихи таңдауымыз - зайырлы мемлекет және қоғам» екенін атап көрсетті», - деді Б.Майлыбаев. Қазақстан Республикасы Дін істері агенттігінің төрағасы Марат Әзілханов құттықтау сөз сөйлеп, өз баяндамасында зайырлы мемлекеттегі діннің рөліне баса назар аударды. Сондай-ақ, пленарлық отырыста «Дінтанушылар конгресі» ҚО төрағасы, Л.Н. Гумилев атындағы ЕҰУ философия кафедрасының меңгерушісі Ғарифолла Есім «Қазіргі замандағы діни ахуал және зайырлы мемлекеттегі дінтанушылардың рөлі» тақырыбында баяндама жасап, Парламент Мәжілісінің депутаты Қамал Бұрханов Қазақстандағы діни толеранттылық жайында айтты. Форумның мақсаты - дін саласындағы мемлекеттік саясатты іске асыру бойынша бірігіп қызмет етуге елдегі отандық ғылыми және сарапшылар қауымдастығының назарын аудару, жалған діни ағымдардың, сондай-ақ, экстремизм мен терроризмнің ықпалын төмендету факторы ретіндегі дінтану білімінің сапасын жоғарылатудың инновациялық жолдарын анықтау, діни ағарту мен халықтың діни сауатын көтерудегі білім беру жүйесінің орны мен рөлін табу және анықтау болып табылады. «Зайырлы мемлекеттің дін саласындағы саясатын іске асыру: аймақтық тәжірибе және проблемалар» атты бірінші секцияда елдегі конфессияаралық тұрақтылықты сақтау бойынша мемлекеттік саясатты іске асыру кезінде туындайтын күрделі мәселелер талқыланды. «Қазақстанның зайырлы оқу орындарындағы дінтану негіздерін оқыту сапасын арттыру: әдіснамалық және практикалық аспектілер» атты екінші секцияда дінтану негіздерін орта және жоғары оқу орындарына маңызды оқу пәндерінің бірі ретінде енгізу жолымен жастар ортасында діни сауаттылық деңгейін көтерудің рөлі мен маңызы талқыға салынды. «Зайырлы мемлекеттегі діни радикализмнің алдын-алу әдіснамалары» атты үшінші секцияның қатысушылары діни радикалды ағымдардың қызметтеріне қатысты өзекті мәселелерді, сондай-ақ қоғамда пайда болатын қауіп-қатерлерді дер кезінде анықтау тетіктері мен оларды шешу жолдарын ортаға салды. «Қазіргі Қазақстан аумағындағы исламның тарихы» атты төртінші секцияда Қазақстан үшін дәстүрлі болып табылатын сүнниттік исламның ханафи мәзһабын қазақ халқының салт-дәстүрлері мен әдет-ғұрыптарын ескере отырып насихаттау қажеттігі жайында айтылды. Биыл тұңғыш рет Қазақстан дінтанушыларының форумында жоғары оқу орындарының үздік оқытушылары мен мектептердің «Дінтану негіздері» пәні мұғалімдері Дінтанушылар конгресінің құрмет грамоталарымен және естелік сыйлықтармен марапатталды. Форумдағы басты оқиғалардың бірі - «Е-Islam» ақпараттық-ағартушылық ғаламтор-порталының тұсаукесері болды. ҚР Дін істері агенттігінің төрағасы Марат Әзілханов бұл портал Мемлекет басшысы Нұрсұлтан Әбішұлы Назарбаевтың Ислам ынтымақтастығы ұйымы мемлекеттері Сыртқы істер министрлерінің 38-ші отырысының қорытындылары бойынша берген тапсырмасын орындау мақсатында дайындалғанын айтты. «Е-Islam» ғаламтор-порталы көпшілік қазақстандық аудиторияға Қазақстандағы ислам туралы толыққанды ақпарат беруге арналған. Одан кейін ҚР Дін істері агенттігінің Ақпараттық-консультативтік орталығы жанында қызмет ететін «Қауырт желі - 144» жобасының да таныстырылымы өтті. Бұл жоба Дін істері агенттігінің тапсырысы бойынша жүзеге асырылды. Жобаның мақсаты - азаматтар мен ұйымдардан діни салаға қатысты барлық мәселелер бойынша ақпараттарды қабылдау, сонымен бірге, деструктивті діни ағымдардың қызметінен зардап шеккендерге консультациялық және психологиялық көмек көрсету болып табылады. Азаматтар «Қауырт желінің» 114 нөміріне Қазақстанның барлық аймағынан тәулік бойы қоңырау шала алады. Орталықта кәсіби психологтар, заңгерлер, дінтанушылар жұмыс жасайды. Кеңес беру тегін әрі құпия түрде жүргізіледі.