Астанада Қазақстанның барлық дыбыс режиссерлері бас қосады
АСТАНА. ҚазАқпарат - 11-16 тамыз аралығында елордадағы Бейбітшілік және келісім сарайында сағат 10.00-де дыбыс режиссерлері мен жарық қою жөніндегі суретшілеріне арналған шеберлік дәрісі өтеді. Бұл туралы astana.kz жазады.
Тренингті Астана қаласының Мәдениет басқармасы мен АҚШ Елшілігі бірлесе ұйымдастыруда. Іс-шараға концерт залдарындағы дыбыс режиссерлері мен жарық қою жөніндегі суретшілер, мәдениет сарайлары, театр, цирк және түрлі студиялардан келетін шығармашыл тұлғалар қатысады.
Ұйымдастырушылардың айтуынша, бұл өз саласында пісіп-жетілген, нағыз майталмандардан тәжірибе алуға мүмкіндік беретін бірегей шара. Өз тәжірибесімен бөлісуге америкалық сарапшылар мен практиктер дайын: Джули Добо ханым - «Company E» техникалық директоры, Пол Эмерсон мырза - «Company E» арт директоры.
Семинарға астаналық цирк, театр және концерт залдарының қызметкерлері де қатысады.
