Астанада көпдеңгейлі тағы 4 паркинг салынады - С.Хорошун
АСТАНА. ҚазАқпарат - Астанада көпдеңгейлі тағы 4 паркинг салынады. Бұл туралы бүгін ҚР Президенті жанындағы Орталық коммуникациялар қызметіндегі брифингте елорда әкімінің бірінші орынбасары Сергей Хорошун мәлім етті.
«Әкімдік қолда бар қаржы ресурстарының тапшылығын ескере отырып, халықаралық қаржы ұйымдарымен займдар мен несиелер, сонымен бірге мемлекеттік жеке-серіктестік қаржысын тарту жұмыстарын жүргізуде. Оның аясында ағымдағы жылдың өзінде біз 4 балабақша, 4 амбулаторлық-емханалық кешен және көпдеңгейлі 4 паркинг құрылысы бойынша жобаларды жүзеге асыра бастауды жоспарлаудамыз», - деді елорда әкімінің бірінші орынбасары.
Оның алға тартқан деректеріне қарағанда, қазіргі уақытта елордада 2591 нысан құрылысы жүргізілуде, сонымен бірге 195 нысанның құрылысы жобалану үстінде.
«Біз 2016 жылы жалпыэкономикалық конъюктураның дамуындағы теріс тенденцияға қарамастан құрылыс саласында экономика өсімі қарқынын 104 пайыздан түсірмейміз деп жоспарлап отырмыз», - деді С.Хорошун.
