Астанада Құрбан айт мерекесіне орай бірқатар шаралар ұйымдастырылуда
АСТАНА. ҚазАқпарат - Бүгін мұсылман қауымының ұлық мерекесі - Құрбан айттың бірінші күні. Таңертең мешіттерде айт намазы оқылуда. Мереке үш күнге - 4, 5 және 6 қазанға жалғасады.
Астанада бірқатар мерекелік шаралар ұйымдастырылып жатыр. «Нұр Астана» және «Әзірет Сұлтан» мешіттерінің алдындағы алаңдарда айт намазынан кейін мерекелік жәрмеңке басталды. Сондай-ақ спорттық жарыстар өткізіледі. 5 қазанда сағат 16.00-де «Хан Шатыр» сауда ойын-сауық орталығының аумағында «Нұр Астана» мешітінің қолдауымен «Құрбан айт құтты болсын!» концерті ұйымдастырылады. Сонымен қатар биыл мал союға рұқсат етілген жерлердің бірі - «Алтын таға» базарында «Раббың үшін құрбандық шал» қайырымдылық шарасы өтеді. Айта кетейік, биыл мал сату және сою «Алтын таға» базарында, «Азық-түлік комбинаты-Астаналық плюс» ЖШС, «Нұрбереке 555» ЖШС, «Шәумен» және «Темеш» шаруа қожалықтарында жүзеге асырылады. 4-6 қазанда мешіт қызметкерлері қаладағы мұқтаж жандардың үйлеріне арнайы барып айт мерекесімен құттықтап, азық-түлік және құрбандыққа шалынған мал еттерімен көмек көрсетеді. Ал қарттар үйіндегі жандарға «Қарттарым - асыл қазынам» мерекелік рухани кеші сыйланбақ, деп хабарланған елорда әкімдігінің ресми сайтында.
