Астанада күрес түрлерінен әлем чемпионатының ресми символдары таныстырылды
АСТАНА. KAZINFORM – Астанада өтетін күрес түрлерінен 2026 жылғы әлем чемпионатының ресми логотипі, маскоты мен медалі таныстырылды. Бұл туралы Қазақстан күрес федерациясы бас хатшысы Гүлбарам Құлахметова мәлімдеді.
Күрес түрлерінен ересектер арасындағы әлем чемпионаты 24 қазан мен 1 қараша аралығында елордадағы Barys Arena спорт кешенінде өтеді.
– Бүгін біз «Астана-2026» әлем чемпионатының ресми логотипін таныстырып отырмыз. Оның визуалды шешімінде күреске тән қозғалыс пен динамика, тұтастық және ұлттық өрнек элементтері бір композицияда біріктірілген, – деді Гүлбарам Құлахметова.
Оның айтуынша, логотиптегі ұлттық өрнектер чемпионаттың Қазақстанда өтетінін айқындаса, көк түстер елдің визуалды болмысымен үндеседі. Сонымен қатар чемпионаттың ресми маскоты – Muzbalaq таныстырылды. Маскот ретінде қыран құстың таңдалуы қазақ дүниетанымындағы оның еркіндік, биіктік, күш, қырағылық және батылдық символы екенімен байланысты.
Сондай-ақ әлем чемпионатының басты марапаттарының бірі – ресми медаль таныстырылды. Оның дизайнында ұлттық ою-өрнек, қыран бейнесі және чемпионаттың негізгі визуалды элементтері біріктірілген.
– Астанаға 1000-нан астам спортшы келеді, бірақ олардың әрқайсысының арманы – әлем чемпионы атанып, осы медальға қол жеткізу. Бірнеше айдан кейін дәл осы медальдар әлемнің үздік балуандарының мойнына тағылады, ал олардың спорттық тарихында «Астана-2026» атауы қалады, – деді ол Орталық коммуникациялар қызметі алаңында.
Федерация өкілінің айтуынша, чемпионаттың ақпараттық науқаны тек жарысты таныстырумен шектелмейді. Негізгі мақсаттардың бірі – шетелдік спортшылар мен жанкүйерлердің Қазақстанға келмей тұрып-ақ Астанаға қызығушылығын арттыру.
Осыған байланысты қала кеңістігін, digital-экрандарды, спорт аренасы мен жанкүйерлер аймақтарын біртұтас визуалды стильде безендіру жоспарланған.
Бұдан бөлек, UWW-мен бірлесіп жарық, дыбыс, музыка, спортшыларды таныстыру, экрандық контент және аренадағы жалпы атмосфера бойынша жаңа тәсілдері әзірленіп жатыр.
Еске сала кетейік, күрес түрлерінен әлем чемпионаты 24 қазан мен 1 қараша аралығында Астанада өтеді. Жарыс бағдарламасына грек-рим, әйелдер және еркін күрес түрлері кіреді.
