Астанада мүгедектер күніне орай бірқатар іс-шаралар өтеді
АСТАНА. ҚазАқпарат - Жыл сайын қазан айының екінші жексенбісінде елімізде мүгедектер күні аталып өтеді. Астанада бұл күндері елордада тұратын мүмкіндігі шектеулі жандарға арналған бірқатар шаралар ұйымдастырылады, деп хабарлады astana.gov.kz.
Атап айтқанда, 9 қазанда Жұмыспен қамту орталығында мүгедектерге арналған бос орындар жәрмеңкесі ұйымдастырылып, іс-шара аясында мемлекеттік органдар мен үкіметтік емес ұйымдар оларға жұмысқа орналасуға көмектеседі. Сондай-ақ, Астана қаласының «Мүгедек балалар қоғамы» қоғамдық бірлестігінің ұйымдастыруымен «Жастар» сарайы алдындағы алаңда мүмкіндігі шектеулі балаларға арналған костюмді «күзгі бал» өтеді. Осы күні №7 қалалық емханада Мүмкіндігі шектеулі балаларға арналған «Жақсылық пен үміттің түсі» атты шығармашылық сурет салу іс-шарасы өткізіледі.
Сондай-ақ, 10 қазанда елорда емханаларында Ашық есік күндері ұйымдастырылады. Астана қаласының «Мүгедек балалар қоғамы» қоғамдық бірлестігі ұйымдастыруымен 12 қазанда мүгедек балалар «Хан шатыр» СОО аттракционына баруға мүмкіндік алады.
13 қазанда №65 инклюзивті жалпы орта білім беретін мектеп-гимназиясында «Әлем балалардың көзімен» атты балалар шығармашылығының көрмесі, орта және жоғары буын оқушылар үшін спартакиада өтеді. Түзету және инклюзивті сынып оқушылары үшін ойын-сауық, концерттік бағдарламалар ұсынылады.
16 қазанда №7 мектеп-гимназиясында «Спортландияға саяхат» атты спорттық іс-шара ұйымдастырылады. Сондай-ақ, ҚСҚҚБ және «Қайсар» спорт клубымен бірге ұйымдастырған шахматтан ашық жарыс өтеді.
Айта кетейік, елордада 15 мыңға жуық мүмкіндігі шектеулі жанға жергілікті бюджеттен 5 мың теңге көлемінде бір реттік материалдық көмек төленеді.
