Астанада оқу үдерісін 07:40-тан бастау мәселесі - әкімдік қарауында
АСТАНА. ҚазАқпарат - Оқу үдерісін сағат 07:40-тан бастау мәселесі әкімдіктің қарауында болып отыр. Бұл туралы ҚазАқпаратқа Астана қалалық Білім басқармасы бастығының орынбасары Қасымхан Семғазиев хабарлады.
Астана қаласының әкімі Әділбек Жақсыбеков ағымдағы жылдың 12 тамызында көлік басқармасына, «Астана ЛРТ» ЖШС және білім басқармасына елорда жолдарында таңғы сағат 7-ден басталатын көлік кептелістеріне байланысты, оларды жеңілдету мәселесін қарастыруды тапсырды. Атап айтқанда, әкім оқу үдерісінің кестесіне өзгерістер енгізу - мектептердегі сабақтарды сағат 7:40-тан бастауды қарастыруды тапсырды. Бұл оқушылар саны 3 мыңнан асатын мектептерге қатысты болып отыр. Аталған мәселе ата-аналар мен педагогикалық ұжымның қарауына шығарылды.
