Астанада өрттен қаза болған бес баланы халық ақтық сапарға шығарып салды

АСТАНА. ҚазАқпарат - Астанада 4 ақпан күні өрттен қаза болған 5 баланы халық ақтық сапарға шығарып салды. Бүгін балалардың жаназасына жиналғандар саны көп болды, деп хабарлайды ҚазАқпарат тілшісі.

Бүгінгі Үкіметтің селекторлық режімдегі отырысында ҚР Премьер-Министрі Бақытжан Сағынтаев өрттен қаза тапқан 5 баланың ата-анасына көңіл айтқан болатын.
Еске сала кетейік, 4 ақпан күні түнде елорданың Сарыарқа ауданындағы «Көктал-1» тұрғын үй алабында жеке үйдің ауласында тұрғызылған уақытша баспанада өрт шықты. Өртті сөндіру барысында 2006, 2008, 2014, 2016, 2018 жылғы 5 қыз баланың денесі табылды.
Олардың кішісі небәрі 11 айлық сәби еді. Өрт кезінде бес баланың ата-анасы түнгі жұмыста болған.