Астанада полиция есірткі саудасымен айналысқан үш күдіктіні ұстады
НҰР-СҰЛТАН. ҚазАқпарат – Елордалық полиция «Құқық тәртібі» жедел-алдын алу шарасы аясында есірткі сатумен айналысқан 3 адамнан тұратын топтың әрекетін әшкереледі, деп хабарлайды ҚазАқпарат Нұр-Сұлтан қалалық полиция департаментінің баспасөз қызметіне сілтеме жасап.
20 тамызда бұрын сотталған 37 жастағы елорда тұрғыны ұсталды. Одан құрамында 350 грамм «гашиш» бар 5 полиэтиленді бума тәркіленіп, оның есірткі заттарын сатумен айналысқан екі сыбайласы да қолға түсті.
Тұрғылықты мекенжайлары бойынша тінту жүргізу кезінде құрамында «гашиш» бар 37 полиэтиленді бума, электронды таразы және 1 млн 165 мың теңге және 2260 АҚШ доллары сомасындағы ақша тәркіленді.
Сөйтіп заңсыз айналымнан 2,5 кг-нан астам «гашиш» тәркіленді, оның бағасы «қара нарықта» 1 миллион теңгені құрайды.
Аталған жайтқа байланысты ҚР ҚК 296-бабы («есірткі заттарды аса ірі мөлшерде заңсыз сақтау») және ҚР ҚК-нің 297-бабы («қылмыстық топтың есірткілік заттарды аса ірі мөлшерде судалауы») бойынша қылмыстық іс қозғалды.
Ұсталғандар уақытша ұстау изоляторына қамалды. Тергеу амалдары жүргізілуде.
Жыл басынан бері Нұр-Сұлтан қаласы полиция департаментінің есірткі қылмысына қарсы іс - қимыл басқармасының қызметкерлері 81 қылмыстық істі қозғады. Олардың 66-сы есірткі заттарын саудалаумен байланысты. Заңсыз айналымнан 45 кг-ға жуық түрлі есірткі заттары тәркіленіп, 2 жасырын есірткі зертханасы анықталды. Сондай-ақ есірткі сатушылар тұтынушыларды тартқан 188 сайт бұғатталды.
