Астанада рұқсат етілмеген жерлерге қар төккен 22 адамға айыппұл салынды
АСТАНА. ҚазАқпарат - Жыл басынан бері елордалық табиғат қорғау полициясының қызметкерлері көшедегі және жолдағы қарды рұқсат етілмеген жерлерге заңсыз төккен 22 автокөлік жүргізушісін әкімшілік жауапкершілікке тартты, деп жазады елорда әкімдігінің ресми сайты.
Астана қ. ІІД Жергілікті полиция қызметінің хабарлауынша, жүргізушілерге 509 040 теңге көлемінде айыппұл салынды.
«Қысқы кезеңде қала аумағын жинау ерекшеліктері» абаттандыру Ережелеріне сәйкес (Астана қ. мәслихатының шешімімен бекітілген, 5 бөлім, 60 т.), көшедегі және жолдағы қарды арнайы дайындалған алаңдарға шығару қажет. Қарды (қоқыссыз) келесі мекенжайлар бойынша шығаруға рұқсат етілген: «Алматы» ауданы - Железнодорожный т.а., әскери бөлімшенің сыртында. «Сарыарқа» ауданы - Н. Тілендиев даңғ., «Тайм» ЖҚС ауданы. «Есіл» ауданы - Рождественка тас жолы, «Рубеж» бекетінің сыртында, оң жақта, сондай-ақ, су тазартқыш құрылыстарының ауданында 27-ші көшеде балқыту станциясы бар.
