Астанада «Шапағат» сауда үйі айналасында сауда жасауға тыйым салынды
АСТАНА. ҚазАқпарат – Астанада «Шапағат» сауда үйінің айналасындағы бей-берекет сауда орындары жойылды, деп хабарлайды ҚазАқпарат.
Қала әкімдігінің баспасөз қызметінен мәлім еткендей, 30-дан астам саудагер ресми түрде кәсіптерін тіркеп, сауда үйлері мен базарларға көшті.
«Қазіргі таңда «Шапағат» СҮ аумағын абаттандыру жұмыстары жүргізілуде. Аталған жерді абаттандыру 4460 тұрғынға қолайлы жағдай жасауға мүмкіндік береді», - деді Астана әкімдігінен.
Айта кетейік, аталған ауданда бей-берекет сауда 10 жылдан астам уақыт бойы жүргізіліп келді.
