Астанада шетелдегі қандастар арасында өнер байқауы өтеді
АСТАНА. ҚазАқпарат - ҚР Мәдениет және спорт министрлігі Тілдерді дамыту және қоғамдық-саяси жұмыс комитетінің ұйымдастыруымен қазан айының 29-30 жұлдызында «Қазақ хандығының 550 жылдығына» арналған шетелде тұратын отандастардың қатысуымен халықаралық өнер фестивалінің аясында жыр мүшәйрасы, термешілер сайысы және сурет көрмесі өтеді.
Байқаудың мақсаты: Қазақ хандығының 550 жылдығын мерекелеудің мәні мен бүгінгі таңдағы тарихи маңызын ашу; Жастарды қазақстандық патриотизмге, отансүйгіштікке тәрбиелеу; Ел мен жердің тарихына құрмет сезімін қалыптастыру; Өскелең ұрпақтың бойына ұлттық рухты сіңіру; Қазақ халқының мәдениеті мен салтын насихаттау; «Мәңгілік ел» ұлттық идеясын насихаттау; Шетелдегі дарынды қазақ жастарының шығармашылығын насихаттау.
Қатысушылардың жас мөлшері 20-35 жас аралығында болуға тиіс. Мүшәйра, терме және көрме сайыстарына қатысушы шетелде тұратын отандасымыз болуы шарт. Сондай-ақ, автордың мүшәйраға және көрмеге жолдаған шығармасы бұрын еш жерде жарияланбаған болуы керек.
Мүшәйра талаптары:
Бірінші өлең - Қазақ хандығының тарихы, тарихи тұлғалар бейнесі, елдік мәселелер тақырыбында болуы керек.
Екінші өлең - шетелдегі қандастар тағдыры мен көші-қон туралы болуы тиіс.
Үшінші өлең - еркін тақырыптағы өлең, үш өлеңге де 3-5 минут уақыт беріледі және үш өлеңде жоғарыда көрсетілген тақырыптар қамтылуы міндетті.
Терме сайысы талаптары:
1 терме - елдікке шақыратын, бірлікке бастайтын, ұлтжандылық бағыттағы термеден бір туынды орындау (3-5 минут);
2 терме - еркін тақырыпта терме орындау (3-5 минут).
Көрме талаптары:
1 тақырып бойынша кескіндеме көлемі 100*150 см.-ден кем немесе артық болмауы тиіс (Материалдары: майлы бояу, гуашь, акварель, кенеп, картон, ақ қағаз).
2 тақырып бойынша графикалық шығарма көлемі 40*90 см. (Материалдары: офорт, линогравюра, литография, т.б.) көркемдік деңгейі талапқа сай, тақырыпқа мейлінше лайық болуы тиіс.
Әрбір автордың көркем шығармасы талапқа сай безендіріліп (багет), саны 5-7 данадан аспауы керек.
Жеңімпаздарды марапаттау әр сайыс бойынша
«Бас жүлде» - біреу - 200 000 (екі жүз мың) теңге;
І орын - екеу - 150 000 (жүз елу мың) теңгеден;
ІІ орын - екеу - 120 000 (жүз жиырма мың) теңгеден;
ІІІ орын - екеу - 80 000 (сексен мың) теңгеден;
Ынталандыру сыйлығы - үшеу - 60 000 (алпыс мың) теңгеден.
Өтініштер 2015 жылдың қазан айының 20 жұлдызына дейін қабылданады. Толығырақ ақпаратты Астана қаласы, Рысқұлбеков көш., 16/3 үй, 203 п. мекенжайы бойынша немесе +7 747-204-88-35 нөмірі арқылы алуға болады.
