Астанада ұлттық спорт түрлерінен Қазақстан чемпионаттары өтеді
АЛМАТЫ. Маусымның 5-і. ҚазАқпарат /Ерлік Ержанұлы/ - Астанада маусымның 7-13-і күндері "Қазанат" ипподромында - "Көкпар", "Аударыспақ", "Теңге алу" мен "Қыз қуудан" Қазақстан чемпионаттары , ал "Сайыс" бойынша республикалық турнир өтеді,
деп хабарлайды ҚазАқпарат.
Бұл байрақты доданы «Көкбөрі» Қазақстан көкпаршылары қауымдастығы» республикалық қоғамдық бірлестігі ұйымдастырып отыр. Бірлестік Қазақстан чемпионатын ересектер арасында 2001 жылдан, жастар арасында (16-20 жас) 2005 жылдан бастап өткізіп келе жатыр. Биыл Қазақстан чемпионаты көкпар мен аударыспақтан - оныншы, теңге алу мен қыз қуудан - төртінші рет өткізіледі. Қазіргі уақытта бұл бәсекеге 11 облыстық, 2 қалалық құрама команда өздерінің қатысатындықтарын растады.
Жалпы ҚР Ұлттык спорт түрлері қауымдастығы 2004 жылы мамырдың 15-інде құрылған болатын. Бүгінгі таңда оның құрамында 15 федерация және 3 халықаралық қор бар. Олар: ҚР Ұлттық ат спорты федерациясы, «Бүркітшілер», «Көкпар», «Жекпе-жек», «Қазақша күрес», «Қыз қуу», «Сайыс-аударыспақ», «Бес қару», «Алыпсоқ», «Тазы-төбет - Алабай» федерациялары. Ал «Көкбөрі» Қазақстан көкпаршылар қауымдастығы» республикалық қоғамдық бірлестігі 2000 жылы Қазақстан Республикасының II Атшылар съезінің тапсырмасымен құрылды. Осы жылы «Кок Бору» халықаралық федерациясы құрылды. Құрылтайшысы - республикалық федерациялар. Оған бастапқыда Қазақстан, Өзбекстан, Қырғызстан және Тәжікстан енген болатын. Кейінірек олардың қатарына Ауғанстан, Ресей, Қытай, Жапония мемлекеттік қауымдастықтары және 8 жуық ел бақылаушы ретінде қатысушы құрамына кірді. Қазақстанның көкпаршылар құрамасы Орталық Азияның 8-10 елі қатысатын жыл сайынғы ҚР Президентінің кубогы мен Халықаралық турнирде 3 дүркін чемпион болды.
