Астанада волейболдан ҚР Қорғаныс министрінің кубогы сарапқа салынған чемпионат аяқталды (ФОТО)
АСТАНА. ҚазАқпарат - Астанада ҚР Қорғаныс министрлігі Орталық аппараты мен ҚР Қарулы күштерінің құрылымдық бөлімшелерінде волейболдан өткен чемпионат өз мәресіне жетті. Аталған іс-шарада ҚР Қорғаныс министрінің кубогы - турнирдің басты жүлдесі үшін 500-ге жуық әскери қызметші, оның ішінде ерлерден құралған 27 топ және әйелдерден құралған 15 топ сайысқа түсті.
Бұл туралы ҚР ҚМ баспасөз қызметі хабарлады.
Табанды сайыстың нәтижесінде әйелдер арасында волейболдан бірінші орынды 55765 әскери бөлімінің командасы жеңіп алса, екінші орынды 14776 әскери бөлімі иеленді, ал үшінші орын ҚР ҚК Құрлық әскерлерінің қыз-келіншектеріне бұйырды.
Ер азаматтар арасындағы топтар бойынша жүлделі орындар өз иесін тапты, атап айтсақ, бірінші орынды - ҚР ҚК Әскерлерді пәтерлерге орналастыру бас басқармасы, екінші орынды - ҚР ҚК Тыл бастығы басқармасы, ал үшінші орынды - Астана қаласының қорғаныс істері жөніндегі департаменті иеленді.
Сонымен қоса чемпионатта үздік ойыншылардың есімдері мәлім болды. Олар 55765 әскери бөлімінің келісімшарт қызметіндегі қатардағы жауынгері Айгүл Тәуей және Астана қаласының қорғаныс істері жөніндегі департаментінің атынан шыққан сержант Ботагөз Мұсаева еді.
