Астанада заңсыз құрылыс жарнамасына тосқауыл қойылды
АСТАНА. KAZINFORM — Елордада үлестік құрылыс нысандарын заңсыз жарнамалаған ақпараттық алаңдарға шара қолданылды. Бұл туралы Қалалық коммуникациялар қызметінде өткен брифингте қала прокурорының көмекшісі Азамат Қазбеков мәлімдеді.
Құқық бұзушылықтың алдын алуға бағытталған мұндай тәжірибе алғаш рет енгізіліп отыр.
— Үлестік құрылыс саласындағы заңсыз жарнаманы анықтап, жолын кесу мақсатында тиісті шаралар қабылдадық. Бұл жұмыс, ең алдымен, Krisha.kz пен 2GIS сервистеріндегі жарнамалық материалдарға қатысты жүргізілді, — деді Азамат Қазбеков.
Оның айтуынша, бұл қадам азаматтардың құқығын қорғауды және құрылыс саласында заңдылық орнатуды көздейді. Сондай-ақ заңсыз кеткен мемлекеттік активтерді қайтару мен меншік құқығын қорғау — «Заң мен тәртіп» қағидатын іске асырудың басты тетігі.
Айта кетейік, бұған дейін елордада құны 2 млрд теңгеден асатын инженерлік желілер мемлекетке қайтарылғаны туралы хабарланған еді.
