Астанада жетімдерге және аз қамтылған отбасы балаларына кинотеатрға кіру тегін болмақ
Бұл туралы бүгін ҚР Президенті жанындағы Орталық коммуникациялар қызметінде өткен баспасөз мәслихатында Астана қаласы Білім басқармасының басшысы Эльмира Суханбердиева мәлім етті.
«Балаларды қорғау күнінің қарсаңында Астана қаласының әкімдігі Білім басқармасы 1 маусымда бірқатар іс-шаралар өткізеді. Елордалық саябақта таңертең оннан бастап кешке дейін «Сәлем, жаз!» атты ойын-сауық бағдарламасы ұйымдастырылады. Эстрада жұлдыздарының қатысуымен қаланың барлық алаңдарында концерттер өтеді. Сонымен қатар жаңа Оқушылар сарайының алдында балалар мен олардың ата-аналарын мерекелік бағдарлама күтіп тұр», - деді ол.
Сондай-ақ қалада жеткіншектер мен балғындардың 1 маусым күні жақсы демалуына жасалатын жағдайлар бұнымен аяқталмайды.
«Астанада аз қамтылған отбасы балаларына және жетімдерге «Сарыарқа» кинотеатрлар желісі тегін жұмыс жасайтын болады. Сонымен қатар бұл балаларды «Думан» ойын-сауық орталығындағы океанариум мен джунгли аниматроникс кешендері де тегін кіргізеді. 1 маусым күні барлық балалардың автобустарда жолда жүруі тегін болады», - деді Э.Суханбердиева.