Астанада жыл басынан бері 25 бала терезеден құлаған
АСТАНА. KAZINFORM — Астанада жыл басынан бері балалардың терезеден құлауына байланысты 25 оқиға тіркелді. Ал республика бойынша дәл осындай 47 оқиға болған.
Бұл туралы Jibek Joly телеарнасының «Бүгін LIVE» бағдарламасында Астана қаласы ТЖД Төтенше жағдайлардың алдын алу басқармасының инженері Әли Арғынбаев хабарлады.
– Астана қаласы бойынша жыл басынан бері 25 оқиға тіркелді. Ал Қазақстан бойынша бұл көрсеткіш – 47. Оқиғалардың жартысынан көбі елордада болып отыр. Өкінішке қарай, 7 бала көз жұмды. Өткен жылы 58 оқиға тіркеліп, 14 бала қаза болған еді, – деді Әли Арғынбаев.
Оның мәліметінше, биыл терезеден құлау салдарынан 18 бала ауыр жарақат алып, ауруханаға жеткізілген. Оқиғалардың басым бөлігі 2-6 жас аралығындағы балалардың қатысуымен болған.
Маман мұндай жағдайлардың негізгі себебі – балалардың ата-ананың қарауынсыз қалуы екенін атап өтті.
– Көп жағдайда ата-аналар масаға қарсы торлардың қауіпсіздігіне сенеді. Алайда балалар терезеге жақындап, сыртқа қарауға ұмтылған кезде торға сүйеніп, онымен бірге жиі құлап кетіп жатады, – деді ол.
Осыған байланысты ТЖД өкілі ата-аналарды қауіпсіздік талаптарын қатаң сақтауға шақырды. Оның айтуынша, балаларды үйде жалғыз қалдырмау, терезе алдына орындық пен үстел секілді жиһаздарды қоймау және терезелерге арнайы блокираторлар орнату қажет.
– Қауіпсіздік ережелеріндегі басты қағида – баланы ешқашан жалғыз қалдырмау. Сондай-ақ терезе алдына орындық немесе үстел қоюға болмайды. Олар бала үшін сатының қызметін атқарады. Бұдан бөлек, терезелерге арнайы блокираторлар орнату маңызды, – деді Әли Арғынбаев.
Айта кетейік, терезеден құлаған балалардың көбі – бес жасқа дейінгілер.
