Астанада жол жөндеу жұмыстарына орай көлік қозғалысы шектелді
АСТАНА. ҚазАқпарат - Астана қаласы Жолаушылар көлігі және автомобиль жолдары басқармасының хабарлауынша, жөндеу жұмыстарына байланысты қазіргі уақытта І.Жансүгіров көшесінде Абылай хан даңғылынан Махтұмқұлы көшесіне дейінгі бөлігінде көлік қозғалысы тоқтатылды.
Үстіміздегі жылдың 1 шілдесіне дейін көлік қозғалысын қалпына келтіру жоспарланып отыр. Сондай-ақ жөндеу жұмыстары кезінде қоғамдық көлік бағыты өзгеріске ұшырайтын болады. №25 автобус бағдарының қозғалысы Манас көшесіне ауыстырылады. Жөндеу жұмыстары аяқталған соң, яғни 1 шілдеден қоғамдық көлік бұрынғы бағдары бойынша жүретін болады, деп хабарлайды astana.kz. Астана қаласының Жолаушылар көлігі және автомобиль жолдары басқармасы аталған көшелерде жол жөндеу жұмыстары ақталғанша жүргізушілерді қозғалыс бағытын алдын-ала жоспарлауға шақырады.
