Астанада жолақы 100 теңгеге көтерілмек
АСТАНА. ҚазАқпарат - Бүгін Астана қаласы Жолаушылар көлігі және автомобиль жолдары Басқармасы Астана қаласындағы жол жүру тарифі жөнінде қоғамдық тыңдау өткізді. Отырыста қозғалған мәселе жайында толығырақ astana.gov.kz сайты жазады.
Ондағы деректерге сүйенсек, 2008 жылдан бері дизель отынының 1 литрі 75 теңгеден 115 теңгеге дейін, яғни 65%-ға өскен. Тасымалдаушылардың қосалқы бөлшектер мен материалдарға шығыны 80%-ға артқан. Ал, елорда тұрғындарының орташа жалақысы 91,2 мыңнан 146,9 мың теңгеге дейін, яғни 61,1%-ға көтерілген. Жолақы құны болса 2008 жылдан бері өзгеріссіз қалуы себепті бүгінде бұл саланы дамытуға қаржы жетіспейді.
Осы себепті Жолаушылар көлігі және автомобиль жолдары басқармасы басшысының орынбасары Әбдіхамит Тамабаев: «Қалалық қоғамдық көліктің тұрақты жұмысын қамтамасыз ету үшін қоғамдық көлікте бір реттік жолақы құнын ересектер үшін 100 теңге, балалар үшін 40 теңге көлемінде белгілеу қажет деп санаймыз», - деді.
