Астанада жүргіншілер өткелінде адам қағып кеткен жүргізуші бас бостандығынан айырылды
АСТАНА. ҚазАқпарат - Астана қаласында Қабанбай батыр даңғылы бойындағы жүргіншілер өткелінде жаяу жүргінші қағып кеткен жүргізушіге қатысты сот үкімі шықты, деп хабарлайды Астана қалалық сотының баспасөз қызметінен.
«Астана қаласы Есіл ауданының №2 аудандық соты Д.Кивеновке қатысты үкім шығарды. Ол ҚР ҚК-нің 296-бабының 2-бөлігімен (көлік құралын жүргізушінің жол жүру ережелерін бұзу салдарынан, абайсызда кісі өліміне әкеліп соғу) қарастырылған қылмысты жасағаны үшін кінәлі деп танылды», делінген хабарламада. 2013 жылғы 4 маусымда сотталушы Д.Кивенов Астана қаласында жол жүру ережесін бұзып, Қабанбай батыр даңғылы бойындағы жүргіншілер өткелінде жаяу жүргінші У.Байжұмановты қағып кеткен. Жол-көлік оқиғасының нәтижесінде жәбірленуші оқиға орнында көз жұмды. 2015 жылғы 17 наурыздағы сот үкімімен Д.Е.Кивенов кінәлі деп танылды. Оған 3 жылға көлік басқару құқығынан, 3 жылға бас бостандығынан айыру түріндегі жазаны қоныс колониясында өтеу тағайындалды. Үкім заңды күшіне енген жоқ.
